AREPAS COA NAI DE ALBA E LUCÍA

 

Hoxe visitóunos a nai de Alba, Mariam, para explicarnos como se fan as arepas. Despois preparou a masa e fritiunas. Nós tamén axudamos un pouco amasando e facendo boliñas. Pasámolo moi ben e despois comímolas. 

 

Estaban boísimas!

 

OBRADOIRO CREATIVO: CREAMOS UN MÓBIL MUSICAL

 Durante estas semanas, o alumnado de 2° estivo construíndo un novo instrumento de música. Trátase dun móbil musical elaborado con pasta de cores, que tinguimos na aula. Unha actividade moi relaxante que consegue estimular todos os sentidos.

 

OBRADOIRO DE ROBÓTICA EN FAMILIA

 

MOSTRA: FIANDO E ILUSTRANDO

As nosas devanceiras veñen vestindo a familia e a casa dende tempos
inmemoriais. Ata hai ben pouco producían e procesaban os tecidos nas casas. Enfiaban, tinguían e cosían sempre buscando funcionalidade e beleza.
Co gallo do Día da Ilustración e ao abeiro do tema anual “O FEITO A MAN” decidiuse solicitar ás familias a participación nunha exposición de pezas tecidas das que dispoñían na súa casa: Manteis, panos de man, bufandas, bonecos,vestidos... 

Estamos moi agradecidos posto que, case 100 obras de arte domésticas enchen a sala de exposicións improvisada na aula STEAM.

Cada peza de roupa ou enxoval doméstico que chegou á escola foi tecida ou bordada non só para o uso que foi feita, senón que tamén ten unha  ademais de cumprir unha función práctica ten unha función estética.

Atopamos pezas que, de seguro, levaron moitas horas de traballo, amosando o dominio de complicadas técnicas e dunha gran capacidade creativa. Son labores  cun gran valor sentimental, son verdadeiras obras de arte.

 Moitas son as capacidades que se precisan para crear pezas así: paciencia, destreza, creatividades, matemática, proporcións...
Podemos dicir que a práctica totalidade foron confeccionadas por mulleres nas súas horas de lecer. Estas técnicas non requiren formación académica en si, pero si atención, cálculo, abstracción...
Os motivos empregados son moi variados: cadros, rectángulos, rombos, espirais ou figuras humanas, animais e vexetais. Uns copiados doutras pezas ou sacados de patróns de revistas, e outros de creación propia.
 

A través desta mostra, buscamos que o noso alumnado coñeza estas actividades  tradicionais e queremos ofrecerlle á rapazada unha alternativa enriquecedora fronte ao exceso de tecnoloxía presente nos fogares, facendo obradoiros de gancho, calceta e bordado, nos tempos de lecer finalizado o tempo de Entroido.
Todas estas labores axudan a desenvolver a motricidade fina, a traballar a
coordinación e a concentración, ademais de achegar importantes beneficios a nivel sensorial e, sobre todo, emocional. Son actividades que transmiten calma, paciencia e benestar emocional, permitindo conectar co feito de crear coas mans e dándolle moita importancia ao tempo compartido.
Na clase de plástica, o alumnado tentou reproducir as tramas de tódalas labouras traídas das casas. Un traballo complicado pero moi satisfactorio tal e como podedes comprobar nas imaxes.

 

Con todas elas fixemos un libriño, Gustavós? 

 

 

 

GRAZAS FAMILIAS POLA VOSA COLABORACIÓN! 

ENCHEMOS BOUZAS DE MÚSICA, COR E EMOCIÓN. UN ENTROIDO BRILLANTE!

 Por fin chegou o día. Logo de ter que adiar o tan esperado pasarrúas, este venres, aínda que non luciu o sol, a comunidade educativa da nosa escola conseguiu sair da escola para desfilar polas rúas acompañados pola comunidade educativa do CEE SAN FRANCISCO. Non foi doado. Logo de prepararnos nas aulas coas mellores galas baixo o lema “O feito a man”, de colocar o Meco no teito do coche e poñer a música festeira a punto, xuntámonos no patio de Infantil para as fotos de grupo.

COMPARSA ENREDADOS NO MAR

COMPARSA CAOS NA COLMEA

COMPARSA OS POMPÓNS TOLOS

COMPARSA METID@S EN FARIÑA

COMPARSA MÁIS BOS CO PAN

COMPARSA @S RONDALLEIR@S DO RESÍO

COMPARSA MÁIS QUE LEITE

COMPARSA FIBRAS NATURAIS

 

Ás 11.00 horas estaba todo listo… pero faltaba a Policía Local. Sen a súa presenza, o Concello non autoriza a saída. Tocou facer chamadas e xestións de última hora porque, malia ter permiso municipal, esqueceran avisalos. Cómpre agradecer a rapidez coa que actuaron desde Comisaría. Ás 11.30, por fin, a comitiva botou a andar nun desfile cheo de vida e ganas de festa.

 

A vila de Bouzas gozou dunha mañá especial co pasarrúas organizado pola nosa escola, O Resío. Alumnado, profesorado e familias converteron as rúas nun espazo de encontro e celebración. Poucos metros despois da saída, incorporouse tamén o alumnado e profesorado do CEE SAN FRANCISCO, sumando aínda máis ambiente á comitiva.

 

Os disfraces, preparados con agarimo nas últimas semanas, renderon homenaxe aos oficios e á cultura tradicional. Desfilaron panadeiros e panadeiras, bonecas de trapo, peixes de cores, leiteiras e leiteriros, colmeas con apicultores facendo de guías, e unha creativa representación das fibras naturais. Non faltaron os rondalleiros e rondalleiras, que animaron o percorrido facendo soar pandeiretas, cunchas e charrascos, mentres as bandeiras se movían ao ritmo da música.

 

A veciñanza saíu ás beirarrúas para aplaudir, fotografar ao paso da comitiiva e acompañar o desfile. A festa continuou na Alameda, onde cada grupo realizou o seu pequeno desfile acompañado da súa propia música, enchendo o espazo de ritmos tradicionais e contemporáneos, acompañados polos aplausos. 

 

Antes de regresar, pequenos e maiores saborearon un doce petisco de chocolate. 

 

A xornada aínda non rematara, agardaba un dos momentos máis esperados. Xa na escola celebrouse o tradicional xuízo do Meco. 

Entre risas e moita expectación, foi condenado e “castigado”  cunha divertida chuva de globos de auga que puxo o punto divertido á mañá.

 

 

A xornada rematou cunha pequena merenda compartida e festa con baile na pista polideportiva.

 Un día sinxelo e fermoso que demostrou, unha vez máis, que cando a escola sae á rúa, toda a xente camiña con ela.

 LIGAZÓN AS IMAXES DO NOSO ENTROIDO 

OBRADOIRO COLOR, ABELLAS E EMOCIÓNS

Hoxe vivimos na escola unha experiencia profundamente enriquecedora a nivel emocional, na que o alumnado de quinto de primaria non só aprendeu sobre as abellas, senón que tamén conectou co mundo natural desde a curiosidade, a admiración e o respecto. Da man do apicultor Nicolás Taracido, de Apipolis, mergullámonos nun universo fascinante que espertou no alumnado emocións moi diversas: sorpresa ao descubrir a complexidade da colmea, entusiasmo ao comprender o funcionamento das abellas e fascinación ante a súa organización social.

Ao longo do obradoiro, o alumnado experimentou unha aprendizaxe vivencial na que os sentidos e as emocións xogaron un papel fundamental. A observación dunha colmea con abellas vivas xerou momentos de expectación e respecto, mentres que a explicación da relación entre a abella raíña e o resto da colmea favoreceu a empatía e a reflexión sobre a importancia de cada individuo dentro dun grupo.

 

  

A través de imaxes, vídeos e materiais reais, así como coa posibilidade de tocar, ulir e degustar os produtos das abellas, o alumnado viviu momentos de alegría, curiosidade e mesmo sorpresa. Estas emocións contribuíron a consolidar as aprendizaxes previas traballadas na aula co mestre Juan, facendo que o coñecemento adquirise un significado máis profundo e duradeiro.

 

Ademais, o contacto directo cos apeiros do apicultor e a explicación dos procesos naturais, como a polinización ou a elaboración do mel e do propóleo, fomentaron valores como o respecto pola natureza, a responsabilidade ambiental e a conciencia da interdependencia entre os seres vivos.

 

A pregunta final —As abellas e nós, nós e as abellas. Quen é o máis importante?— abriu un espazo de reflexión emocional no alumnado, promovendo o pensamento crítico e a valoración do equilibrio natural.

 

Foi, sen dúbida, unha xornada chea de aprendizaxe significativa, na que as emocións actuaron como motor do coñecemento. Grazas, Nicolás, por achegarnos esta experiencia tan inspiradora.

Agora, cheos de ilusión e confianza, o alumnado prepárase para compartir todo o aprendido nas xornadas de expertos coa comunidade educativa.

PROGRAMA ENTROIDO 2026

 

OLLO-MAN É O MECO DO RESÍO, ESTOS SON OS SEUS MANDATOS

Benqueridos nenos e nenas, pais e nais, mestres e mestras, eu son... OLLO-MAN, o que manda nesta festa. Todos os días, ás 14.30h,  poderedes ver aquí os meus mandatos. Imos divertirnos...

 

CHEGA O ENTROIDO, CHEGA OLLO-MAN

  

 Levamos na escola moitos días tentando crear no laboratorio das artes ao Meco 2026. Non foi tarefa sinxela, pero gozando do proceso podemos ensinarvos xa ao noso meco FEITO A MAN.

 Benqueridas familias o Entroido xa chegou, hoxe, coñecimos de primeira man ao noso meco, o Meco OLLO-MAN 

 

Ao chegar á escola, este singular personaxe do Entroido estaba a esperarnos no recibidor da escola. Que susto! 

Será un super heroe?

 

Posando con Ollo-Man logo de facer o seu retrato

 

Non sabemos se terá súper poderes, pero el é quen manda e ordena, e a quen todos e todas deberemos obedecer, se queremos gozar da festa sen problemas.